Isaiah 10

1Maye kulabo abenza imithetho emibi, lakulabo ababhala izimemezelo ezicindezelayo,

2ukuba kwamukwe abayanga amalungelo abo lokugodla okufaneleyo kwabantu bami abacindezelweyo; bazingela abafelokazi baqhwage izintandane.

3Lizakwenzani ngosuku lokuthonisiswa lapho incithakalo isiza ivela khatshana? Lizabalekela kubani ukuba lithole usizo na? Lizayitshiya ngaphi inotho yenu?

4Akukho okuzasala, kodwa ukuba baquthe phakathi kwabathunjiweyo loba bafe lababuleweyo. Ikanti kukho konke lokhu, ukuthukuthela kwakhe akupheli, isandla sakhe silokhu siphakanyisiwe.

UNkulunkulu Wahlulela i-Asiriya

5“Maye kum-Asiriya, intonga yentukuthelo yami, esandleni sayo kulesagila solaka lwami!

6Ngimthumela ukuyamelana lesizwe esingelankulunkulu, ngimthumela ukuyamelana labantu abangithukuthelisayo, ukuba athumbe ahluthune impahla yokuthunjwa, lokubanyathelela phansi njengodaka ezindleleni.

7Kodwa lokhu akusikho akujongileyo, lokhu akusikho okusengqondweni yakhe; injongo yakhe yikutshabalalisa, abhubhise izizwe ezinengi.

8Uthi, ‘Izinduna zami zebutho kazisimakhosi zonke na?’

9‘IKhalimo kaliphumelelanga njengeKharikhemishi na? IHamathi kalinjenge-Ariphadi na? LeSamariya kayinjengeDamaseko na?

10Lanjengoba isandla sami sabamba imibuso yezithombe, imibuso ezifanekosi zayo zedlula ezeJerusalema lezeSamariya –

11angiyikuliphatha iJerusalema lezifanekiso zalo ngendlela engaphatha ngayo iSamariya lezithombe zayo na?’ ”

12Lapho uJehova esewuqedile wonke umsebenzi wakhe mayelana lentaba iZiyoni leJerusalema uzakuthi, “Ngizayijezisa inkosi yase-Asiriya ngenxa yokuzigqaja kwayo lokuzazisa okubonakala emehlweni ayo.

13Ngoba uthi: “ ‘Ngamandla esandla sami sengenze lokhu njalo langokuhlakanipha kwami, ngoba ngilokuqedisisa. Ngayisusa imingcele yezizwe, ngathumba inotho yazo; njengolamandla nganqoba amakhosi azo.

14Njengomuntu efinyelela isidleke senyoni, ngokunjalo isandla sami safinyelela enothweni yezizwe, njengabantu bebutha amaqanda atshiyiweyo, kanjalo ngaqoqa amazwe wonke; akukho okwaphaphazelisa amaphiko loba okwavula umlomo wakho kwatshiyoza.’ ”

15Konje ihloka liyaziphakamisela ngaphezu kwalowo olizulisayo na, loba isaha izincome imelane lalowo oyisebenzisayo na? Njengangathi induku izanyikinya lowo oyiphakamisayo, kumbe isagila sinyikinye lowo ongasiso sigodo!

16Ngakho-ke uJehova, uJehova uSomandla uzathumela isifo esicikizayo kumabutho ayo aqinileyo; ngaphansi kobukhosi bayo kuzaphembeka umlilo njengelangabi elibhebhayo.

17Ukukhanya kuka-Israyeli kuzakuba ngumlilo, oNgcwele wabo abe lilangabi, ngosuku olulodwa lizatshisa liqede ameva akhe lokhula lwakhe.

18Ubuhle bamahlathi akhe lamasimu akhe avundileyo, uzakuqeda ngokupheleleyo njengalapho umuntu ogulayo ecikizeka.

19Izihlahla zamahlathi ezisalayo zizakuba zilutshwana, okungathi lomntwana azibale.

Insalela yako-Israyeli

20Ngalolosuku insalela yako-Israyeli, abendlu kaJakhobe abasindayo, kabasayikwethemba kuye owabatshayayo kodwa ngeqiniso bazathembela kuJehova, oNgcwele ka-Israyeli.

21Insalela izabuyela, insalela kaJakhobe izabuyela kuSomandla uNkulunkulu.

22Loba abantu bakho, we Israyeli, benjengetshebetshebe olwandle, kuzabuya insalela kuphela. Incithakalo isimenyezelwe, iyabakhulela kodwa ilungile.

23UJehova, uJehova uSomandla uzasifeza isimemezelo sokubhujiswa elizweni lonke.

24Ngakho-ke lokho yikho uJehova, uJehova uSomandla akutshoyo: “Awu bantu bami abahlala eZiyoni, lingawesabi ama-Asiriya alitshaya ngentonga njalo lawo aliphakamisela isagila njengokwenziwa yiGibhithe.

25Masinyane ukulithukuthelela kwami kuzaphela, ulaka lwami luzaqondiswa ekubhujisweni kwabo.”

26UJehova uSomandla uzabatshaya ngomchilo njengalapho atshaya iMidiyani edwaleni lase-Orebi, njalo uzaphakamisela intonga yakhe ngaphezu kwamanzi njengalokhu akwenza eGibhithe.

27Ngalolosuku imithwalo yabo izasuswa emahlombe enu, lejogwe labo ezintanyeni zenu; ijogwe lizakwephulwa ngoba selizimukile.

28Bayangena e-Ayathi; badabula phakathi kweMigironi; bagcina impahla eMikimashi.

29Badlula emkhandlwini bathi, “Ebusuku sizalala eGeba.” IRama liyathuthumela; iGibheya likaSawuli liyabaleka.

30Hlaba umkhosi we Ndodakazi kaGalimi, lalela we Layishi! Yeka Anathothi ozihawulelayo!

31IMadimena iyabaleka; abantu baseGebhimi bazacatsha.

32Ngalolosuku bazakuma kancane, kancane eNobhi, bazakhomba ngezinqindi zabo intaba yeNdodakazi yeZiyoni, eqaqeni lwaseJerusalema.

33Khangelani, uJehova, uJehova uSomandla uzaquma izingatsha ngamandla amakhulu. Izihlahla ezidephileyo zizaqunywa. Ezinde zazo zizakwehliselwa phansi.

34Ngehloka uzagamula izixuku zehlathi; iLebhanoni izakuwa phambi kwakhe olaMandla.